">
काठमाडौं । युनाइटेड इन्स्योरेन्सको सिईओ उपासना पौडेलको राजिनामा स्वीकृत भएको छ । कम्पनीको सञ्चालक समितिले पौडेलको राजिनामा कार्तिक २८ गते (सोमबार) देखि लागू हुनेगरी स्वीकृत गरेको हो ।
कम्पनीको सिईओ पौडेलले व्यक्तिगत कारण देखाउँदै गत असोज ७ गते कम्पनीको संचालक समिति समक्ष राजिनामा बुझाएकी थिइन् । उनको राजिनामा स्वीकृत गर्दै कम्पनीले सोही दिनबाटै लागू हुनेगरी कम्पनीको निमित्त प्रमुख कार्यकारी अधिकृत (सिईओ)को जिम्मेवारी नविन सुवेदीलाई दिएको छ ।
गतवर्ष मात्रै युनाईटेड इन्स्योरेन्सको सिईओको रुपमा ४ वर्षका लागि नियुक्त भएकी पौडेलले कार्यकाल अवधि डेढ वर्ष नपुग्दै राजीनामा दिएकी हुन् । यसो त उनी सो कम्पनीको सीइओ हुँदा नै उनको योग्यता नपुगेको र नियम मिचेर सीइओ पद दिईएको चर्चा इन्स्योरेन्स क्षेत्रमा थियो । त्यतिबेला नै पनि उनले कम्पनीको सीइओ पद सम्हाल्न सक्दिनन्, र उनको कार्यकाल पूरा हुन गाह्रो हुने अड्कलबाजी धेरैले गरेका थिए । नभन्दै उनले कम्पनीबाट राजिनामा दिएकी छिन् ।
पौडेल हिमालयन रिइन्स्योरेन्स कम्पनीमा जानका लागि युनाइटेडबाट राजिनामा दिएको बुझिएको छ ।
३४ वर्षकी पौडेल इन्स्योरेन्स क्षेत्रकै सबैभन्दा कान्छी सिइओ हुन् । पौडेलले भारतको दिल्ली युनिभर्सिटिबाट एमबिए गरेकी छिन् । उनले भारतकै आईसीआईसीआई लोम्बार्ड इन्स्योरेन्समासमेत काम गरेकी छिन् । सानिमा जनरल इन्स्योरेन्सको सहायक महाप्रवन्धकमा डेढ वर्ष काम गरेकी पौडेल यूनाइटेड इन्स्योरेन्समा डेढ वर्षदेखि सीइओका रुपमा कार्यरत थिइन् ।
