काठमाडौं । सिद्धार्थ बैंक र नेपाल एसबिआई बैंकले ग्राहकबाट नियम विपरित ब्याज असुली गरेको प्रमाणित भएको छ । ग्राहकबाट गैरकानुनी रुपमा ब्याज असुली गरेको भन्दै राष्ट्र बैंकले फिर्ता गर्न निर्देशन दिएसँगै दुवै बैंकले सो रकम फिर्ता गर्ने भएका हुन् । यसले बैंकको ठगीलाई झनै पुष्ठी गरेको छ ।
राष्ट्र बैंकले गत वर्ष सिद्धार्थ बैंकले ३० करोड रुपैयाँ र नेपाल एसबिआई बैंकले ५ करोड ७५ लाख रुपैयाँ ग्राहकसँग नियम विपरित असुली गरेको पाएको थियो । यो सँगै राष्ट्र बैंकले सो रकम फिर्ता गर्नका लागि निर्देशन समेत दिएको थियो । तर, बैंकहरुले नियम विपरित असुलेको रकम फिर्ता नगरेपछि राष्ट्र बैंकले साधारण सभाको स्वीकृति रोकेको थियो ।
हाल गैरकाुनुनी रुपमा असुलेको रकम फिर्ता गर्ने प्रक्रिया सुरु गरेसँगै दुवै बैंकले साधारण सभा गर्ने अनुमति पाएका छन् । सिद्धार्थ बैंकले वित्तीय विवरण पारित गर्दै लभांश दिने अनुमति समेत पाइसकेको छ ।
राष्ट्र बैंकले यसअघी नै ११ बैंकलाई नियम विपरित असुल गरेको ब्याज फिर्ता गर्न निर्देशन दिएको थियो । ती ११ वाणिज्य बैंकले नियम विपरित असुल गरेको १ अर्ब ७१ करोड ७० लाख रुपैयाँ फिर्ता गर्न शुरु गरेपछि साधारण सभा गर्न समेत स्वीकृति प्रदान गरिएको थियो ।
