काठमाडौं । एक साता अघिसम्म संसारकै धनी व्यक्तिको सूचीमा तेस्रो नम्बरमा रहेका भारतका गौतम अडानी अर्बपतिहरुको सुचीमा ‘टप १०’बाट बाहिरिएका छन् । फोब्र्सका अनुसार बुधबार थप १२ अर्ब डलर सम्पत्ति गुमाएपछि उनी अर्बपतिको सुचीमा १५औँ स्थानमा पुगेका हुन् ।
हाल अडानीको नेटवर्थ भारतका अर्का अर्बपति मुकेश अम्बानीको भन्दा पनि तल झरेको छ ।
केही दिन अघि ‘हिन्डेनबर्ग रिसर्च’ले सार्वजनिक गरेको ३२ हजार शब्दको एक रिपोर्टका कारण अडानी समूहका सेयर मूल्यमा भारी गिरावट आएको हो । रियल टाइम्ब बिलिनियर्सका अनुसार हाल सर्वाधिक धनीको सूचीमा १५औँ स्थानमा रहेका अडानीको सम्पत्ति ७४.७ अर्ब डलरमा झरेको छ ।
‘हिन्डेनबर्ग’को रिपोर्ट सार्वजनिक भएयता अडानीले ४८ अर्ब डलरभन्दा धेरै सम्पत्ति गुमाएका छन् । गतवर्ष अर्थात सन् २०२२ मा अडानीले वृद्धि गरेको नेटवर्थ उनले सन् २०२३ को पहिलो महिनामै गुमाएका छन् ।
