काठमाडौं । निर्वाचन आयोगले चितवनको निर्वाचन क्षेत्र नम्बर २ मा बैशाख १० गते उपनिर्वाचन गर्ने निर्णय गरेको छ । आयोगको आइतबार बसेको बैठकले प्रतिनिधिसभा सदस्य निर्वाचन ऐन, २०७४ अनुसार बैशाख १० गते उपनिर्वाचन गर्ने निर्णय गरेको हो ।
नागरिकता विवादका कारण राष्ट्रिय स्वतन्त्र पार्टीका सभापति रवि लामिछानेको सांसद पद खारेज भएसँगै रिक्त रहेको सांसद पदको लागि आयोगले बैशाख १० गते उपनिर्वाचनको समय तोकेको हो ।
आयोगका अनुसार उपनिर्वाचनका लागि फागुन १ गतेदेखि चैत्र १६ गतेसम्म मतदाता नामावली अद्यावधिक कार्यक्रम सञ्चालन गर्नेछ भने चैत २० गते मनोनयन दर्ता गर्नेछ ।
यता आयोगले उपनिर्वाचनको मिति तय गरेसँगै नेकपा एमाले र माओवादीले भने चितवन २ मा हुने उपनिर्वाचनमा उम्मेदवार नउठाउने गरी तयारी गरेको छ । ‘अहिलेको स्थिति चितवन २ को उपनिर्वाचनमा उम्मेवार नउठाउने र रवि जिलाई नै साझा उम्मेदवारका रुपमा अघि सार्ने कि भन्ने छलफल चलेको छ’, एमालेका एक नेताले भने, ‘यद्यपी अहिले यो विषय छलफलमै छ । तर, अधिक सम्भावना उम्मेदवार नउठाउने नै देखिन्छ ।’
