काठमाडौं । बैंकविरुद्धको आन्दोलनले सुरक्षा चुनौती थपेको भन्दै नेपाल बैंकर्स संघले सुरक्षा व्यवस्था मिलाउन सरकारसँग माग गरेको छ । बैंकको ऋण नतिर्ने भन्दै देशव्यापी रुपमा आन्दोलन चर्किरहेका बेला ‘सुरक्षा थ्रेट’ बढेको भन्दै संघले सरकारसँग सुरक्षा माग गरेको हो ।

संघका अध्यक्ष सुनिल केसी नेतृत्वको टोलीले गृहसचिव विनोदप्रकाश सिंह तथा नेपाल प्रहरीका प्रमुख धिरजप्रताप सिंहलाई भेटेर सुरक्षा मागेको हो । भेटका क्रममा बैंकविरुद्धको आन्दोलनले बैंक सञ्चालन गर्नै मुस्किल भएको भन्दै सुरक्षा व्यवस्था मिलाउन माग गरिएको संघका एक पदाधिकारीले बताएका छन् । ‘अहिले बैंकको ऋण तिर्दैनौँ भन्ने समूह आन्दोलनमा उत्रिएको छ । कतिपय ठाउँमा त वित्तीय क्षेत्रमा कार्यरत कर्मचारीहरुमाथि दुव्र्यवहार समेत भएको छ ।’ उनले भने, ‘यही स्थितिमा काम गर्न चुनौती थपिएको छ । त्यसैले सरकारसँग सुरक्षा व्यवस्था मिलाउन आग्रह गरेका छौँ । हाम्रो मागप्रति उहाँहरु सकारात्मक नै हुनुहुन्छ ।’

त्यस्तै, भेटका क्रममा गृहसचिव र प्रहरी प्रमुखले बैंकर्स संघको माग सम्बोधन गर्ने आश्वासन दिएका छन् । संघका अध्यक्ष केसीको नेतृत्वमा गएको टोलीमा उपाध्यक्ष सन्तोष कोइराला तथा कार्यसमिति सदस्य सुदेश खालिङ तथा संघका प्रमुख कार्यकारी अधिकृत अनिल शर्मा सहभागी रहेका थिए ।