गोरखा । गोरखामा भएको मिनीट्रक दुर्घटनामा परी राष्ट्रिय बाणिज्य बैंकमा कार्यरत कर्मचारीको ज्यान गएको छ । जिल्लाको गोरखा नगरपालिका-६, बिसौनीमोडमा भएको मिनी ट्रक दुर्घटनामा घाइते भएका राष्ट्रिय बाणिज्य बैंकमा गजुरी शाखामा कार्यरत ३२ वर्षीय विष्णु खड्काको चितवनस्थित मेडिकल कलेजमा उपचारको क्रममा निधन भएको हो ।
दुर्घटनामा परी खड्कासहित २ जनाको उपचारका क्रममा निधन भएको जिल्ला प्रहरीका कार्यालय गोरखाका डीएसपी लिलाराज लामिछानेले पुष्टी गरेका छन् ।
‘दुर्घटनाका गम्भीर घाइते २ जनाको भरतपुर मेडिकल कलेजमा उपचार भइरहेको छ । बर्दिया घर भएका २८ वर्षीय मंगल चौधरी, सहिद लखन गाउपालिका–४ का बुद्धिबहादुर नेपालीलाई उपचारका लागि चितवन पठाइएको छ’ डिएसपी लामिछानेले भने ।
प्रहरीका अनुसार अन्य १ को भने सनाखत हुन सकेको छैन । प्रहरीका अनुसार दुर्घटनामा घाइते भएका अन्य ६ जनाको उपचार भईरहेको छ ।
बसपार्कबाट आबुखैरेनी जाँदै गरेको प्रदेश–३–०१–००३ क ६१७० नम्बरको मिनी ट्रक अनियन्त्रित हुँदा एक मोटरसाइकल र पैदलयात्रीलाई ठक्कर दिँदै सडकबाट तल खसेको थियो ।
