- अर्थ सरोकार सम्बाददाता
काठमाडौँ । केन्द्रिय बैंकले १ अर्ब ७८ करोड रुपैयाँ बराबरको रकम मुद्दती निक्षेपमा लगानी गर्ने भएको छ । राष्ट्र बैंकले बैंक तथा वित्तीय संस्थाको एक वर्षे मुद्दती निक्षेपमा उक्त रकम लगानी गर्न लागेको हो । राष्ट्र बैंकको उपदान तथा पेन्सन जस्ता कोषमा रहेको उक्त रकम २०७८ असार १ गतेदेखि २०७९ असार १ गतेसम्मको लागि मुद्दती निक्षेपमा लगानी गर्न लागेको हो ।
जसमा १ अर्ब ४२ करोड ४० लाख रुपैयाँ वाणिज्य बैंकमा, विकास बैंकमा २६ करोड ७० लाख रुपैयाँ र वित्त कम्पनीहरूमा ८ करोड ९० लाख रुपैयाँ बराबरको रकम लगानी गरिने भएको हो । बैंकहरुले चाहेको रकम तथा उक्त रकमका लागि प्रस्ताव गरिएको ब्याजदरसमेत खुलाई जेठ २५ गते दिउँसो ५ बजेभित्र पेश गर्नुपर्नेछ ।
