काठमाडौँ। सेयर बजारका चर्चित लगानीकर्ता शिव चन्द्र अव फिल्म निर्माता भएका छन् । उनले निर्माण गर्न लागेको चलचित्र कोतपर्वको बिहिबार काठमाडौँमा आयोजित ऐतिहासिक नेपाली चलचित्र ‘नालापानी’को च्यारिटी प्रदर्शनीमा घोषणा गरिएको छ । वि.सं. १९०३ असोज २ गते काठमाडौँको हनुमाढोका दरबारमा घटेको नेपालको ऐतिहासिक र सनसनीपूर्ण घटना ‘कोतपर्व’मा आधारित रही बन्ने सो चलचित्रलाई रिमेश अधिकारीले निर्देशन गर्दैछन् । यसअघि अधिकारीले ‘नालापानी’ निर्देशन गरेका थिए ।
बिहिबार आयोजित नालापानीको विशेष प्रदर्शन र कोत पर्वको विशेष जानकारी कार्यक्रममा प्रतिनिधिसभा सदस्य हरि ढकालले नेपालीहरुले नेपालको इतिहास बिर्सन नहुने बताएका थिए । ‘त्रिभुवन विश्वविद्यालयमा अहिले इतिहाससँग सम्बन्धित प्राध्यापकहरु हुनुहुन्छ तर, पढ्ने विद्यार्थी छैनन् । जुन देशको कला संस्कृति र इतिहासमा यस प्रकारको विपद आउँछ, यसले सामजिक विचलन ल्याउँछ’, कार्यक्रममा बोल्दै ढकालले भने, ‘कला, संस्कृति, धर्म र इतिहासको विचलन आउने बित्तिकै समाजमा विचलन आउँछ । हामीले ति लक्षणहरु भोगिसकेका छौँ ।’
ढकालको प्रमुख आथित्यतामा भएको सो च्यारिटी कार्यक्रममा ‘कोतपर्व’का निर्देशक, लेखक तथा निर्माता परिचय गराईएको छ । यस चलचित्रका निर्देशक अधिकारीको कम्पनी ‘रिमेश अधिकारी फिल्मस’ र यस चलचित्रका एशोसियट निर्देशक श्रीदेव बिएलको कम्पनी ‘श्रीत फिल्म्स एण्ड इन्टरटेन्मेन्ट’को संयुक्त ब्यानरमा यो चलचित्र बन्ने जानकारी गराईएको छ । शिवचन्द्रका अलावा चलचित्रलाई अर्का सेयर लगानीकर्ता राजेन्द्र ढकाल लगायतले सहनिर्माताको रुपमा फिल्ममा लगानी गरेका छन् ।
