">
काठमाडौं । लक्ष्मी बैंक र सनराईज बैंकलाई एकीकृत कारोबार गर्न नेपाल राष्ट्र बैंकले अन्तिम स्वीकृति प्रदान गरेको छ । राष्ट्र बैंकबाट अन्तिम स्वीकृति पाएसँगै दुवै बैंकले असार २८ गते (बिहीबार)देखि एकीकृत करोबार सुरु गर्ने तयारी गरेका छन् ।
सनराईजका अध्यक्ष मोतिलाल दुगडले लक्ष्मी बैंकबाट करिब ३ अर्ब रुपैयाँ कर्जा लिएकोले बैंक तथा वित्तीय संस्था सम्बन्धी ऐनआुसार सञ्चालक बन्न नपाउने भन्दै राष्ट्र बैंकले यसअघि एकीकृत कारोबारका लागि स्वीकृति दिन आनाकानी गरेको थियो । तर, मर्जरपछि बन्ने नयाँ बैंकको सञ्चालक समितीबाट सनराइजले दुगडको नाम हटाइएपछि राष्ट्र बैंकले एकीकृत कारोबार गर्न अन्तिम स्वीकृति प्रदान गरेको हो ।
नयाँ बन्ने सञ्चालक समितिबाट दुगडको नाम हटाइए पनि उनको ठाउँमा प्रस्ताव भएको नयाँ नाम भने खुलेको छैन । योसँगै नयाँ बन्ने बैंकको सञ्चालकमा लक्ष्मी बैंकका तर्फबाट रमन नेपाल, मनिस थापा र स्वाति रुंगटा रहेका छन् भने सनराइजका तर्फबाट बच्छाराज तातेड र माचन्द्र दुगड रहेका छन् ।
यो संगै अब मर्जर पछि बन्ने नयाँ बैंकको नाम लक्ष्मी सनराईज बैंक लिमिटेड रहने भएको छ । मर्जपश्चात् बन्ने नयाँ बैंकमा हाल लक्ष्मी बैंकका सीईओ अजयबहादुर शाह नियुक्त हुनेछन् । मर्जरपश्चात् पहिलो साधारणसभासम्मको लागि लक्ष्मीबाट ४ जना र सनराइजबाट ३ जना गरी ७ सदस्यीय सञ्चालक समिति बन्नेछ ।
दुवै बैंकबीच २०७९ साल पुस २५ गते १ः१ सेयर स्वाप रेसियोमा मर्ज हुने गरी सैद्धान्तिम सहमति भएको थियो । दुवै बैंकको गत असार ३ गते सम्पन्न साधारसभाले मर्जरमा जाने विशेष प्रस्ताव पारित गरिसकेको छ ।
