काठमाडौं । १०० किलो सुन तस्करी प्रकरणमा राजस्व अनुसन्धान विभागले रेडि ट्रेडर्सको गोदामबाट साढे ११ सय थान ‘ब्रेक शु’ बरामद गरेको छ । विभागले बुधबार कम्पनीको सोह्रखुट्टेस्थित गोदाममा छापा मार्दा ११ सय ६२ थान ‘ब्रेक शु’ बरामद गरेको हो ।
बरामद गरिएका ‘ब्रेक शु’ मध्ये आधाभन्दा धेरैबाट सुन निकालिएको पाइएको प्रारम्भिक परिक्षणबाट खुलेको छ । हाल बरामद गरिएका ‘ब्रेक शु’हरु ल्याब परिक्षणका लागि भन्सार विभागमा पठाइएको छ ।
रेडी ट्रेडर्सको गोदामबाट सुन पगाल्ने उपकरण एक थान र सुन तौलिने तुलोसमेत बरामद गरिएको विभाग स्रोतले बताएको छ । स्रोतका अनुसार कम्पनीको गोदामबाट ६६ वटा प्योकटमा ११ सय ६२ थान ‘ब्रेक शु’ बरामद गरिएको छ ।
विभागका अनुसार रेडि ट्रेडर्सले २०७९ चैत्र १९ गतेदेखि २०८० साउनसम्म १ हजार ३ सय १७ किलो ‘ब्रेक शु’ आयात गरेको पाइएको छ । बुधबार विभागले छापा मारेको गोदाम चिनियाँ नागरिकले भाडामा लिएर सञ्चालन गरेका थिए ।
