काठमाडौं । पछिल्लो समय लघुवित्त वित्तीय संस्थाहरुमा बचतकर्ताको बचत हिनामिना गरेका प्रकरण सतहमा आउन थालेका छन् । यसै पनि केही समय अघि मात्रै स्वावलम्बन लघुवित्त वित्तीय संस्था र आरम्भ चौतारी लघुवित्त वित्तीय संस्था लगायतका लघुवित्तमा बचतकर्ताको लाखौं रकम हिनामिना भएको समाचार अर्थ सरोकारले सम्प्रेषण गरेको थियो । त्यसलगत्तै अर्थ सरोकारले लक्ष्मी लघुवित्त वित्तीय संस्थामा पनि संस्थाका कर्मचारीले लाखौँ रुपैयाँ हिनामिना गरेको तथ्य फेला पारेको छ ।
संस्थाको अछामको साँफेबगर नगरपालिकास्थित शाखा कार्यलयमा १ सय २ जना बचतकर्ताको ४४ लाख बढी रकम हिनामिना भएको पाइएको छ । संस्थाका कर्मचारी प्रेमसिंह महराले बचतकर्ताबाट उठाएको रकम संस्थामा जम्मा नगरी आफै चलाउने गरेको पाइएको हो । यसरी हिनामिना गरेको रकम सिंहले अरुलाई ब्याजमा दिने गरेकोसमेत स्रोतले बताएको छ ।
‘महरा संस्थाका सदस्य समूहमा रकम संकलनका लागि फिल्डमा जान्थे । सदस्यबाट संकलन गरेको रकम उनी आफै चलाउँथे ।’, स्रोतले भन्यो, ‘यो विषय संस्थाका शाखा प्रमुखलाई पनि थाहा थियो । तर, खासै कुनै चासो दिँदैनथे ।’
प्रेमले यसरी गर्ने रकम हिनामिनामा संस्थाका तत्कालीन शाखा प्रमुख गोकर्ण प्रसाद अवस्थीले पनि सघाउने गरेको स्रोतको दाबी छ । यता संस्थाका जनरल हेड दिलिप शर्माले पनि उक्त प्रकरणमा अवस्थीको संलग्नता देखिएको स्विकार गरेका छन । ‘मिलेमतो भन्दा पनि केहि रकम तत्कालीन शाखा प्रमुख अवस्थीले चलाएको देखिएको थियो । उनले चलाएको करिब ८ लाख रुपैयाँ फिर्ता पनि गरिसके ।’, अर्थ सरोकारसँग कुराकानी गर्दै उनले भने, ‘बचतकर्ताको रकम हिनामिना गरेको थाहा पाएपछि उनलाई संस्थाबाट निकालिसकेका छौँ । उनिविरुद्द पनि अहिले अदालतमा मुद्दा चलिरहेको छ ।’
के भन्छ प्रहरी ?
यसो त संस्थाको रकम हिनामिना गरेको आरोपमा प्रहरीले संस्थाका कर्मचारी प्रेमसिंह महरालाई पक्राउ पनि गरिसकेको छ । जिल्ला प्रहरी कार्यालय अछामका प्रवक्ता तथा प्रहरी नायब उपरीक्षक सन्तोष पाठकले पनि लक्ष्मी लघुवित्तका कर्मचारी पक्राउ परेको पुष्टि गरेका छन् ।
लघुवित्तमा बचतकर्ताको लाखौँ रकम हिनामिना गरेको आरोपमा पक्राउ गरि पुर्पक्षका लागि कारागार चलानसमेत गरिसकिएको डिएसपी पाठकले बताएका छन् । ‘हामीकहाँ बचतकर्ताहरुले रकम ठगिएको भन्दै जाहेरी नै दिनुभएको छ । सोही जाहेरीका आधारमा पक्राउ गरिएको हो ।’, अर्थ सरोकारसँग कुराकानी गर्दै उनले भने, ‘अहिले ती कर्मचारीलाई पुर्पक्षका लागि कारागार चलान गरिसकिएको छ । अदालतमा मुद्धा विचाराधीन छ ।’
