काठमाडौँ । एनआईसी एशिया बैंकको नाफा ४२ प्रतिशतले घटेको छ । बैंकले चालु आर्थिक वर्षको पहिलो त्रैमाससम्मको अपरिष्कृत वित्तीय विवरण सार्वजनिक गर्दै खुद नाफा ४२.४९ प्रतिशतले घटेको जनाएको हो ।
बैंकले चालु आर्थिक वर्षको पहिलो त्रैमासमा १ अर्ब १ करोड ३ लाख रुपैयाँ खुद नाफा आर्जन गरेको छ । जबकी बैंकले गत वर्षको सोही अवधिमा १ अर्ब ७५ करोड ६७ लाख रुपैयाँ नाफा कमाएको थियो । पहिलो त्रैमासमा बैंकको खुद ब्याज आम्दानी घट्नुका साथै इम्पेयरमेन्ट चार्ज बढेका कारण बैंकको नाफामा दबाब पुगेको हो ।
बैंकले सार्वजनिक गरेको वित्तीय विवरणअनुसार यसअवधिमा बैंकको खुद ब्याज आम्दानी १७.५५ प्रतिशतले घटेको छ भने खुद फी आम्दानी तथा कमिशनमा २७.४१ प्रतिशतले वृद्धि भएको छ ।
त्यस्तै, समीक्षा अवधिमा बैंकको इम्पेरमेन्ट चार्ज बढेर ६४ करोड ४३ लाख पुगेको छ । त्यस्तै, बैंकको कुल सञ्चालन आम्दानी ११.११ प्रतिशत र सञ्चालन मुनाफा ३८.९४ प्रतिशतले घटेको छ । चालु आर्थिक वर्षको पहिलो त्रैमासमम्ममा बैंकको वितरणयोग्य मुनाफा भने ९८ करोड ४२ लाख रुपैयाँ ऋणात्मक रहेको छ ।
चालु आवको पहिलो त्रैमासमा बैंकको नाफासँगै प्रतिसेयर आम्दानी (ईपीएस) पनि घटेको छ । यस अवधिमा बैंकको ईपीएस ३२ रुपैयाँ ५३ पैसाले घटेर ५९ रुपैयाँ ६२ पैसाबाट २७ रुपैयाँ ९ पैसा कायम भएको छ । हाल बैंकको प्रतिसेयर नेटवर्थ २०२ रुपैयाँ ५ पैसा रहेको छ ।
