काठमाडौँ । सरकारले सवारी चालक अनुमति पत्र (ड्राइभिङ लाइसेन्स)को नविकरण अवधि १० वर्ष बनाउने तयारी गरको छ । सवारी तथा यातायात व्यवस्था ऐनमा संशोधन गर्दै भौतिक पूर्वाधार तथा यातायात मन्त्रालयले सवाई लाइसेन्सको अवधि १० वर्ष बनाउने तयारी गरेको हो ।

यसका लागि सवारी तथा यातायात व्यवस्था विधेयक-२०८० को मस्यौदा निर्माणको काम अन्तिम चरणमा पुगेको बताइएको छ ।

मन्त्रालयका एक अधिकारीका अनुसार सवारी तथा यातायात व्यवस्था ऐन-२०४९ लाई संशोधन गर्दै सवारी तथा यातायात व्यवस्था ऐन-२०८० जारी गर्न लागिएको हो । सोही विधेयकमार्फत सरकाले हाल ५ वर्ष रहेको सवारी चालक अनुमतिपत्रको नविकरण अवधि १० वर्ष हुनेगरी व्यवस्था लागू गर्न लागिएको ती अधिकारीको भनाई छ ।

त्यस्तै, ती अधिकारीका अनुसार संशोधन सहितको विधेयकमा ठूला सवारी साधन चलाउनका लागि चालकको उमेर २३ वर्ष, मझौला तथा साना चार पांग्रे सवारी साधन चलाउन २१ वर्ष र दुई पांग्रे सवारी साधन चलाउन १८ वर्ष पूरा भएको हुनुपर्ने व्यवस्था पनि गर्न लागिएको छ । योसँगै सरकारले जारी गर्न लागेको संशोधित विधेयकमा मोटरसाइकल वा अन्य दुई पांग्रे सवारी साधन चलाउँदा चालक र पछाडि बस्ने यात्रुले अनिवार्य रुपमा हेल्मेट लगाउनुपर्ने व्यवस्था पनि गरिएको छ ।