काठमाडौँ । नेपाल दूरसञ्चार प्राधिकरणको अध्यक्षमा सिए भूपेन्द्र भण्डारी नियुक्त भएका छन् । आइतबार बसेको मन्त्रिपरिषद बैठकले भण्डारीलाई नियुक्त गरेको हो ।

भण्डारी लामो समय दूरसञ्चार क्षेत्रमा काम गरेका व्यक्ति हुन् । दूरसंचार क्षेत्रमा मात्र होइन, लेखा व्यवसाय, बित्त, फिनटेक, बैंकिङ लगायतका विषयमासमेत विज्ञ मानिने भण्डारी चार्टर्ड एकाउन्टेन्टसमेत हुन् । उनी सन् २००५ देखि भारतको चार्टर्ड एकाउन्टेन्टस् संस्था (आईसीएआई) र सन् २००७ देखि नेपाल चार्टर्ड एकाउन्टेन्टस संस्था (आइक्यान)का सदस्यसमेत हुन् ।

साबिकको श्रीलंका मर्चेन्ट बैंकमा कम्पनी सचिवको रुपमा १० महिना काम गरेका भण्डारीले त्यसपछि एक बर्ष ९ महिना कर्णाली डेभलपमेन्ट बैंकमा सीइओको रुपमा काम गरेका थिए । त्यसपछि ८ महिना सीएससी एण्ड कम्पनी नामक अडिट फर्ममा काम गरेका उनी त्यसपछि पशुपति बिकास बैंक (हालको हिमालयन बैंक)मा काम गर्न गए । त्यहाँबाट करिव ७ महिनाका लागि तत्कालीन स्पाइस नेपाल (मेरो मोबाइल)मा काम गरेका उनी अफ्रिकी देशहरुमा टेलिकम क्षेत्रमा काम गर्न गए । अफ्रिकामा पनि उनी टेलिकम कम्पनीको सीइओका रुपमा काम गरेका विज्ञ हुन् । त्यसपछि पे नेप (मोरु डिजिटल वालेट)मा अध्यक्षका रुपमा रहेका उनी सञ्चार तथा सूचना प्रविधि मन्त्रालयमा सल्लाहकार हुन गएका थिए ।