काठमाडौँ । नेपाल फाइनान्स लिमिटेडको नाफामा भारी गिरावट देखिएको छ । कम्पनीले सार्वजनिक गरेको चालु आर्थिक वर्षको तेस्रो त्रैमासम्मको अपरिस्कृत वित्तीय विवरणमा कम्पनीको खुद नाफामा भारी गिरावट देखिएको हो । यसअवधिमा कम्पनीको खुद नाफा ८७ प्रतिशतले घटेको छ ।
चालु आर्थिक वर्षको पछिल्लो ९ महिनामा कम्पनीले १३ लाख १८ हजार रुपैयाँ मात्रै नाफा कमाएको छ । जुन, गत आर्थिक वर्षको तुलनामा ८७.२५ प्रतिशत कम हो । गत आर्थिक वर्षको सोही अवधिमा कम्पनीले १ करोड ३ लाख रुपैयाँ नाफा कमाएको थियो ।
यसो त समीक्षा अवधिमा कम्पनीको खुद ब्याद आम्दानी १३.२८ प्रतिशत र खुद फि तथा कमिसन आम्दानी ५७.८९ प्रतिशतले बढेको छ । तर, खुद ब्याज आम्दानी बढे पनि कम्पनीको इम्पेयरमेन्ट चार्ज बढेपछि नाफा घटेको हो । यसअवधिमा कम्पनीको इम्पेयरमेन्ट चार्ज १ करोड ६६ लाख रुपैयाँ पुगेको छ । त्यस्तै, यस अवधिमा फाइनान्सको कुल सञ्चालन आम्दानी समीक्षा अवधिमा १८.५० प्रतिशत बढेको छ भने सञ्चालन मुनाफा ८२.२३ प्रतिशत घटेको छ ।
समीक्षा अवधिमा कम्पनीको नाफासँगै प्रतिसेयर आम्दानी (ईपीएस) पनि घटेको छ । यसअवधिमा कम्पनीको यस्तो आम्दानी १ रुपैयाँ ६५ पैसा घटेर २४ पैसामा सीमित भएको छ । सो अवधिसम्ममा फाइनान्सको मूल्य आम्दानी अनुपात १६८२.४५ गुणा रहेको छ भने प्रतिशेयर नेटवर्थ १३४ रुपैयाँ ८३ पैसा रहेको छ ।
