काठमाडौं। नेपाली कांग्रेसका सांसद विश्वप्रकाश शर्माले सहकारी ठगी प्रकरणमा जोडिएका जीबी राईलाई पक्राउ गर्न माग गरेका छन् । आइतबार बसेको प्रतिनिधि सभा बैठकमा शर्माले राईलाई पक्राउ गर्ने प्रक्रिया सुरु नगरिएकामा गुनासो गरेका थिए ।
‘गृहमन्त्रीले लोकेसन पत्ता लाग्यो भनेको चार दिन भयो । प्रतिपक्षमा हुँदा उहाँले जीवी राईलाई सरकारले पक्रिन चाहेन । पक्रिन चाहेको भए यतिको समय किन लाग्छ ? भन्नुभएको थियो । लोकेसन पत्ता लाग्दा पनि पक्रिन चार दिन किन लाग्छ ?,’ उनले प्रश्न गरे ।
त्यस्तै, गोर्खा मिडियाका तत्कालीन दुई जना मालिकमध्ये एक जना फरार रहेको र अर्का गृहमन्त्री रहेको भन्दै महामन्त्री शर्माले भने, ‘सहकारी ठगीमा फरार भएको व्यवसायिक साथीलाई सहकारी ठगीमै अनुसन्धानको दायरामा रहेका गृहमन्त्रीजीले गिरफ्तार गर्नुछ । त्यसैले लोकेसन पत्ता लागिसक्यो भनेर माइकबाट फुक्नुको अर्थ के हुन्छ ? अभियुक्त पक्रिने नयाँ शैली हो ? केटाकेटीपन हो कि भगाउने नियत हो ?’
देशलाई जीबी राईको लोकेसन नभई जीबी राई चाहिएको उनले बताए ।
