काठमाडौँ । इसेवामा समस्या देखिएपछि प्रयोगकर्ताहरु आत्तिएका छन् । इसेवामा समस्या मात्र नभई लिंक गरिएको बैंक खाता नै रित्याईदिन सक्ने मालवेर अट्याक भएको आशंकासहितका चर्चा हुन थालेपछि प्रयोगकर्ताहरु झन् आत्तिएका हुन् । आत्तिएका प्रयोगकर्ताले बैंक खाता अनलिंक गर्ने, एप नै अनस्टल गर्ने लगायतका कामलाई तिब्रता दिएका छन् ।

इसेवामा लिंक गरिएको बैंक खाता नै रित्याईदिन सक्ने मालवेर अट्याक भएको दाबी केहि इसेवाका कर्मचारीहरुले नै गरेका छन् । यद्यपी इसेवाले भने त्यस्तो गम्भीर विषय केहि नरहेको, मालवेर अट्याक नभएको बरु केहि प्राविधिक समस्या भएको दाबी गरेको छ । तर, केचाहिं समस्या आएको हो भन्ने विषय इसेवाले नखुलाउँदा कम्पनीको दाबीमा विश्वासको संकट देखिएको छ ।

इसेवामा पटक पटक समस्या आएपछि राष्ट्र बैंकले चासो दिएको छ । राष्ट्र बैंकका अधिकारीहरुले इसेवालाई यस विषयमा सोधनी गरेका छन् । इसेवाले भने प्राविधिक समस्याका कारण केहि सेवा अवरुद्ध भएको भन्ने जवाफ राष्ट्र बैंकका अधिकारीहरुलाई दिएको राष्ट्र बैंकका एक अधिकारीले अर्थ सरोकारलाई बताए । ‘पटक पटक किन यस्तो हुन्छ भनेर हामीले इसेवालाई सोधेका थियौँ । उसले प्राविधिक समस्या देखाएको छ ।’ राष्ट्र बैंकका एक अधिकारीले अर्थ सरोकारसँग भने, ‘राष्ट्र बैंकले इजाजत दिएको सेवामा समस्या आउने विषय सिरियस विषय हो । यसलाई हामीले सिरियसली लिएका छौँ ।’