काठमाडौँ । प्रकाश तामाङ (काले)ले दुई बैंकमा खाता खोलेका छन् । नागरिकता पाएपछि प्रकाशले ग्लोबल आइएमई बैंक र राष्ट्रिय वाणिज्य बैंकमा खाता खोलेका हुन् ।
प्रकाशको घर नजिकै भएकाले ग्लोबल आइएमई बैंक र सरकारी भएकाले राष्ट्रिय वाणिज्य बैंकमा गरी दुई बैंकमा बैंक खाता खोलिएको सञ्चारकर्मी राजेश राईले जानकारी दिएका छन् ।
प्रकाशको सहयोगार्थ यसअघि नै बैंक खाता खोल्ने भनिए पनि नागरिकता नै नहुँदा बैंक खाता खोल्न असहज भएको तर हाल नागरिकता बनिसकेकोले बैंक खाता खोलिएको राईले बताएका छन् । अब देश तथा विदेशबाट प्रकाश तामाङलाई सहयोग गर्न चाहनेले सिधै प्रकाशको बैंक खातामार्फत सहयोग गर्न सक्ने राईको भनाई छ ।
चुम भ्यालीको कथा गर्ने क्रममा विद्या चापागाइँसहित ‘हेर्ने कथा’को टिमले प्रकाशलाई भेटेको थियो । त्यसपछि ‘हेर्ने कथा’ मार्फत प्रकाशको कथामा आधारित ‘हराएका वर्षहरु’ सार्वजनिक भएपछि प्रकाशको चर्चा चुलिएको थियो । ‘हराएका वर्षहरु’ हेरेपछि प्रधानमन्त्री केपी शर्मा ओलीलेसमेत प्रकाशको नागरिकता बनाउने र उनलाई सहयोग गर्ने विषयमा चासो देखाएका थिए ।
अन्ततः प्रकाश तामाङले नागरिकता पाउनुका साथै बैंकमा खातासमेत खोलेका छन् । हाल प्रकाश तामाङको घर बनाइदिन पूर्व संस्कृति, पर्यटन तथा नागरिक उड्डयनमन्त्री सुदन किरातीसहितको टोलीले अभियान नै सञ्चालन गरेको छ भने काठमाडौँमा भएका भोजपुरे युवाहरुले प्रकाशको सहयोगार्थ र भोजपुरको सम्पाङ छाप्लेगाउँमा सम्मानित जीवन बाँच्ने वातावरण निर्माण गर्न अभियान चलाएका छन् ।
