- अर्थ सरोकार सम्बाददाता
स्याङ्जा । स्याङ्जामा थप १२ जना कोरोना संक्रमण पुष्टी भएको छ । मालपोतका कर्मचारी, वडा सचिव र संक्रमित जुवाडेका आफन्तसहित १२ जनामा संक्रमण पुष्टी भएको हो । संक्रमित हुनेमा ५ महिला र ७ पुरुष छन् । संक्रमितका प्रत्यक्ष सम्पर्कमा रहेकाको कन्ट्याक ट्रेसिङ्का आधारमा गरिएको पीसीआर परीक्षणमा १२ जनामा संक्रमण पुष्टि भएको पुतलीबजार नगर स्वास्थ्य प्रमुख विष्णुप्रसाद काफ्लेले जानकारी दिए।
यसरी थपिनेमा मालपोतका कर्मचारी ४ जना, पुतलीबजार नगरपालिकाका एकजना, समुदायका ७ जना रहेको नगर स्वास्थ्य प्रमुख बिष्णुप्रसाद काफ्लेले जानकारी दिए। उनीहरुलाई पुतलीबजार स्थित करेन्डाँडा स्वास्थ्य केन्द्र र भीरकोटस्थित कालिका सामुदायिक अस्पतालको आइसोलसनमा राखिएको छ । योसंगै स्याङ्जामा संक्रमितको संख्या ३ सय ४९ पुगेको छ।
पाँच दिनअघि मालपोतका एकजना कर्मचारी र १९ जना जुवाडेमा कोरोना संक्तमण पुष्टि भएपछि उनीहरुको सम्पर्कमा आएका मध्ये ७५ जनाको कन्ट्याक ट्रेसिङ गरी परीक्षणका लागि पोखरा पठाइएको थियो ।
