काठमाडौँ । ठूला ऋण नउठाउने अनि साना ऋणीलाई नियम मिचेर दुःख दिने गरेको भन्दै ऋणीहरुले कृषि विकास बैंकमा ताला लगाइदिएका छन् । बिहीबार ऋणीहरुले बैंकको सिराहस्थित लहान शाखामा ताला लगाइदिएका हुन् । बैंककै कर्मचारीको मिलेमतोमा बैंकले प्रक्रिया मिचेर बहुमूल्य जग्गा सस्तोमा लिलाम गरिदिएको ऋणीपक्षको आरोप छ ।
बैंकले आफूहरुलाई जानकारी नै नदिई र प्रक्रियासमेत पूरा नगरी धितो लिलाम गरेको भन्दै उनीहरुले बैंकको शाखा कार्यालयमा तालाबन्दी गरेर नाराबाजी गरेका थिए । उनीहरुले प्रक्रिया मिचेर बैंकले लिलाम गरेको जग्गा फिर्ता नगरेसम्म आन्दोलन गर्ने चेतावनी दिएका छन् ।
लहान नगरपालिका–२ का रामचन्द्र यादवका अनुसार उनले २०७७ फागुन १५ गते बैंकमा ७ धुर जग्गा धितो राखेर ३० लाख रुपैयाँ ऋण लिएका थिए । हालसम्म उक्त ऋणको साँवा र किस्ता गरी कुल १९ लाख ९२ हजार ७ सय ७३ रुपैयाँ तिरेको यादवको भनाई छ । तर, पनि बैंकले आफ्नो जग्गा लिलाम गरिदिएको यादवको आरोप छ ।
बिना जानकारी करिब डेढ करोड पर्ने जग्गा बैंकले कर्मचारीको मिलेमतोमा ३५ लाखमै लिलाम गरेपछि ऋणीपक्ष आन्दोलित बनेका हुन् । उनीहरुले बैंकमा तालाबन्दी गरेर आन्दोलनको घोषणासमेत गरेका छन् ।
यता बैंकका कर्मचारीले भने प्रक्रिया अनुसार नै जग्गा लिलाम गरेको दाबी गरेका छन् । ऋणीहरुले एक्कासी आएर बैंकमा तालाबन्दी गरेर नाराबाजी गर्न थालेपछि आफूहरु दिनभर बैंकभित्रै थुनिएको बैंकका एक कर्मचारीले बताएका छन् । ‘ऋणीहरु एक्कासी आए, बैंकमा ताला लगाए र नारा लगाउन थाले ।’, ती कर्मचारीले भने, ‘दिनभर बैंकभित्रै थुनियौँ, घटनाको जानकारी केन्द्रीय कार्यालयमा पनि गरेका हौँ तर सीईओ सरले हालखबरसमेत बुझ्नुभएन ।’
प्रतिक्रिया दिनुहोस्