काठमाडौँ । नेपाल राष्ट्र बैंकले व्यक्तिसँग जोडिएको विषय बैंकसँग जोडेर गलत प्रचार गर्नु गलत भएको बताएका छ । पाथिभरा केबलकार निर्माणको विरोधका क्रममा ग्लोबल आइएमई बैंकमाथि आक्रमण भएको विषयमा प्रतिक्रिया दिँदै राष्ट्र बैंकले उक्त कार्य गलत भएको बताएको हो ।
राष्ट्र बैंकको बैंक तथा वित्तीय संस्था नियमन विभागका विभागीय प्रमुख गुरु प्रसाद पौडेलले सामाजिक सञ्जाल फेसबुकमा एक पोष्ट सार्वजनिक गर्दै यस्तो प्रतिक्रिया दिएका छन् ।
उनले पाथिभराको विषयलाई लिएर ग्लोबल आइएमई बैंकमाथि गरिएको प्रहार गलत भएको बताएका छन् । त्यस्तै, उनले कसैको उक्साहटमा लागेर उच्छृङ्खल गतिविधि नगर्न पनि आग्रह गरेका छन् ।
‘पाथीभरा केबलकार निर्माणको विषयलाई लिएर नेपाल राष्ट्र बैंकबाट इजाजतपत्र प्राप्त ‘क’ वर्गको वाणिज्य बैंक- ग्लोबल आईएमई बैंकमाथि गरिएको प्रहार गलत हो, कसैको उक्साहटमा त्यस्ता उच्छृङ्खल गतिविधिमा संलग्न नहुँदा राम्रो ।’, उनले लेखेका छन् ।
केही समयदेखि ताप्लेजुङको पाथिभरा क्षेत्रमा केबलकार निर्माणको विरोधमा आन्दोलनरत पक्षले उक्त विषयलाई बैंकसँग जोडेर ग्लोबल आइएमई बैंकविरुद्धको अभियान नै चलाएका छन् । उनीहरुले चन्द्र ढकाल अध्यक्ष रहेको ग्लोबल आइएमई बैंकमा खाता बन्द गर्न र पैसा झिक्न आह्वान गर्दै आएका छन् ।
