काठमाडौँ । नेपाल राष्ट्र बैंकले ८ प्रतिशतसम्म खराब कर्जा भएका बैंक तथा वित्तीय संस्थामा निक्षेप राख्ने भएको छ । एक सूचना जारी गर्दै राष्ट्र बैंकले आफ्नो विभिन्न कोषमा रहेको ४ अर्ब ७९ लाख रुपैयाँ बराबर रकम वाणिज्य बैंक, विकास बैंक र वित्त कम्पनीमा राख्ने जनाएको हो ।

जसमध्ये वाणिज्य बैंकमा ३ अर्ब २० करोड ६५ लाख, विकास बैंकमा ६० करोड ११ लाख र वित्त कम्पनीमा २० करोड ३ लाख मुद्दती निक्षेपमा राखिने राष्ट्र बैंकले जनाएको छ ।

यस्तो निक्षेप राख्न चाहने बैंक तथा वित्तीय संस्थाको निष्क्रिय कर्जा कुल कर्जा सापटीको ८ प्रतिशतभन्दा कम हुनुपर्ने र खुद निष्क्रिय कर्जा अनुपात ३ प्रतिशत हुनुपर्ने राष्ट्र बैंकले जारी गरेको सूचनामा उल्लेख गरिएको छ । यसअघि राष्ट्र बैंकले ५ प्रतिशतभन्दा बढी खराब कर्जा भएको बैंक तथा वित्तीय संस्थामा निक्षेप राख्ने गरेको थिएन ।

त्यस्तै, निक्षेपमा रकम लिन चाहने बैंक तथा वित्तीय संस्था सञ्चालन भएको कम्तीमा दुई वर्ष पूरा भएको हुनुपर्नेछ । यसका अलावा राष्ट्र बैंकबाट तोकिएको न्यूनतम पूँजीकोष कायम गरेको हुनुपर्ने, खुद तरल सम्पत्ति केन्द्रीय बैंकले तोकेको न्यूनतम सीमा कायम गरेको हुनुपर्ने, कर्जा÷निक्षेप अनुपात समय–सयममा निर्धारण गरिएको सीमाभित्र रहेको हुनुपर्ने र निकटतम अघिल्लो आर्थिक वर्षमा खुद मुनाफामा रहेको हुनुपने सर्त राष्ट्र बैंकको छ ।