काठमाडौँ । समस्याग्रस्त कर्णाली डेभलपमेन्ट बैंकको ‘ड्यु डिलिजेन्स अडिट’ (डिडिए) सकिएको छ । डिडिए रिपोर्टमा बैंक गम्भीर संकटमा रहेको देखिएको छ ।
रिपोर्टमा बैंकको प्रारम्भिक वित्तीय विवरण नेटवर्थ एक अर्ब ९० करोड ७३ लाख १७ हजार रुपैयाँ ऋणात्मक छ । तर, आवश्यक समायोजन र मूल्यांकपछि नेटवर्थ अझै बढेर दुई अर्ब ४६ करोड ७७ लाख ४४ हजार रुपैयाँ ऋणात्मक पुगेको छ । यसले बैंक गम्भीर संकटमा रहेको प्रष्टाउँछ ।
अर्कोतर्फ बैंकमा ऋणको अत्याधिक दुरुपयोग भएको, अनधिकृत कर्जा प्रवाह गरिएको र सम्पत्तिको ओभर भ्यालुएसन गरिएका तथ्य पनि रिपोर्टले खुलासा गरेको छ । रिपोर्टका अनुसार बैंकमा एक अर्ब ५० करोड २२ लाख ६७ हजार रुपैयाँ अपव्यय र अनधिकृत लेनदेन गरेको पनि फेला परेको छ ।
त्यस्तै, बैंकले साधारण सभा नगरेको, सेयर बजार नियामकमा आवश्यक प्रतिवेदन नबुझाएको र कद समेत समयमा दाखिला गरेकोजस्ता त्रुटीहरु पनि भेटिएको छ । बैंकलाई नेपाल राष्ट्र बैंकले गतवर्ष पुष १० गते समस्याग्रस्त घोषणा गरेको थियो । हाल बैंकमा भएको अनियमितता र घोटालाका विषयमा प्रहरीको केन्द्रीय अनुसन्धान ब्युरो (सीआईबी)ले समेत अनुसन्धान गरिरहेको छ ।
