">
- अर्थ सरोकार सम्बाददाता
काठमाडौं । नेपाल कम्युनिस्ट पार्टी (नेकपा) का अध्यक्ष तथा पूर्व प्रधानमन्त्री पुष्पकमल दाहाल प्रचण्डसहित परिवारका सबै सदस्यहरूको कोरोना भाइरस परीक्षण गरिएको छ । उनका र परिवारका सबै सदस्यहरूको कोरोना भाइरस परीक्षणको रिर्पोट नेगेटिभ आएको छ ।
विध म्यानेजमेन्ट प्रालिको प्रयोगशालामा भएको परीक्षणमा प्रचण्ड र उनका परिवारका सदस्यहरूसहित ५३ जनाको कोरोना परीक्षण गरेकोमा ६ जना सुरक्षाकर्मीमा भने संक्रमण देखिएको छ ।
६ जना सुरक्षाकर्मी बाहेक सबैको रिर्पोट नेगेटीभ आएको निजी सचिवसमेत रहेकी प्रचण्डकी छोरी गंगा दाहालले उल्लेख गरेकी छन् । उनले सामाजिक सञ्जालमा लेखेकी छन्, ‘अध्यक्ष लगायत हामी सम्पूर्ण परिवारका सदस्यहरू, सुरक्षाकर्मीहरू र सचिवालयका सदस्यहरूले कोभिड–१९ स्वाब परीक्षण गर्दा, बाहिरी घेरामा रहनुहुने ६ जना सुरक्षाकर्मीलाई कोरोना पोजेटिभ देखिएको छ । ६ जना बाहेक हामी सबैको रिर्पोट नेगेटिभ आएको जानकारी गराउँदछु ।’
