">
- अर्थ सरोकार सम्बाददाता
काठमाडौँ । साताको कारोबारको पहिलो दिन आइतबार सेयर बजार घटेको छ । बिहिबारको तुलनामा बजार ४२.७८ अंकले घटेर १३९६.२८ बिन्दुमा पुगेको छ ।
नेपाल स्टक एक्सचेन्ज (नेप्से)का अनुसार कुल १ सय ८९ कम्पनीको ४६ लाख ६१ हजार ६०८ कित्ता सेयर खरिद बिक्री हुँदा १ अर्ब ८४ करोड माथिको कारोबार भएको छ । जसमा सबैभन्दा बढी कारोबार नेपाल पुनर्बिमा कम्पनीको भएको छ । यस कम्पनीको कुल २२ करोड ६५ लाखमाथिको कारोबार भएको छ । त्यसपछि कारोबार क्रमश : नेपाल लाईफ इन्स्योरेन्स र एनएमबि बैंकको भएको छ ।
यता, आइतबारको कारोबार सबै उपसुचक घटेका छन् । सबैभन्दा धेरै आरम्भ चौतारी लघुवित्त र अजोड इन्स्योरेन्सलगायत कम्पनीका लगानीकर्ताले कमाएका छन् भने सबैभन्दा धेरै जोशी हाइड्रोपावर र ओरेन्टल होटललगायत कम्पनीका लगानीकर्ताले गुमाएका छन् ।
