• अर्थ सरोकार सम्बाददाता 

वीरगंज । पर्सा र बारामा एकै दिन ५० जनामा कोरोना संक्रमण भेटिएको छ । पर्सामा ४ र बारामा ४६ गरी कुल ५० जनामा कोरोना संक्रमण भेटिएको हो । पर्सामा भेटिएका ४ जना होटल कुमु प्यालसको पेड क्वारेन्टाइनमा बसेका पुरुषहरु रहेको र उनीहरु भारतबाट आएको नारायणी अस्पतालका मेडिकल सुपरिटेन्डेन्ट डाक्टर मदनकुमार उपाध्यायले बताए ।

बाराको देवताल गाउँपालिकाको क्वारेन्टाइनमा बसेका ४६ जनामा कोरोना पुष्टि भएको उनले बताएका छन् । नारायणी अस्पतालको ल्याबमा आइतवार परीक्षण भएको नमुनामा एकै दिन ५० जनामा कोरोना पुष्टि भएको हो । बाराको देवतालमा भेटिएका ४६ जनामध्ये १० जना महिला र ३६ जना पुरुष रहेको बताइएको छ । कोरोना पुष्टि भएका सबैलाई पर्सा र बारामा तोकिएको आइसोलेसनमा उपचार भइरहेको छ ।