">
- अर्थ सरोकार सम्बाददाता
विराटनगर । विराटनगर र भारत सीमाको जोगबनी देशकै महत्त्वपूर्ण मध्येको एक नाका हो । नेपाल र भारतमा कोरोना संक्रमणको त्रास बढेसँगै दुवै देशमा रहेका मानिस यताबाट उता जाने र उताबाट आउने क्रम चलिरहेको छ । देशका अन्य नाकाबाट स्वदेश फर्कने नेपालीको संख्या धेरै भए पनि जोगबनी नाकाको परिस्थिति भने अलि भिन्न छ । यहाँबाट नेपाल फर्कने भन्दा विराटनगर–जोगबनी हुँदै भारततिर फर्कनेको संख्या अधिक देखिएको छ । सीमा सिल भई लामो समय बितेपछिको पछिल्लो दुई साताको तथ्यांकले जोगबनी भएर नेपाल आउने भन्दा पनि भारत जानेको संख्या धरै देखाएको छ ।
प्रदेश १ सरकार, जिल्ला प्रशासन कार्यालय मोरङ र सुरक्षा सक्रियतामा नेपालीलाई उद्धार गरी स्वदेश भित्र्याउने काम चलिरहेको छ । नेपालमा अलपत्र परेका र देश फर्कन चाहने भारतीयलाई पनि भरतका सुरक्षा निकाय तथा प्रशासनसँगको समन्वयमा पठाउने गरिएको छ । जिल्ला प्रहरी कार्यालय मोरङको पछिल्लो तथ्यांकअनुसार जोगबनीबाट नेपाली भित्रने भन्दा पनि भारतीयहरू बिहार प्रवेश गरी भारतका अन्य सहरसम्म पुग्ने दर बढी देखिएको हो ।
भारतका विभिन्न ठाउँबाट जोगबनी सीमासम्म आएका १ हजार ७०४ जनालाई नेपाल प्रहरीले समन्वय गरी नेपाल प्रवेश गराएको छ । मोरङ प्रहरीका प्रवक्ता डीएसपी मानबहादुर राईले दुई साताको अवधिमा जोगबनीबाट २४४ जना नेपाली स्वदेश आएको बताए । नेपालका विभिन्न ठाउँबाट ४६७ महिलासहित २ हजार २७० जना भारतीयलाई सुरक्षाकर्मीको समन्वयमा भारततर्फ पठाइएको छ । नेपालतर्फ ल्याइने मानिसहरूलाई होल्डिङ सेन्टरमा राखी सम्बन्धित पालिकातर्फ पठाइने गरिएको छ ।
