• अर्थ सरोकार सम्बाददाता 

काठमाडौं । छिमेकी राष्ट्र भारतमा कोरोना भाइरसका एक लाख संक्रमित निको भएका छन् । भारतको स्वास्थ्य मन्त्रालयका अनुसार पछिल्लो २४ घण्टामा करिब पाँच हजार संक्रमित निको भएसंगै निको हुनेको संख्या एक लाख ३०३ पुगेको छ । पछिल्लो समय भारतमा संक्रमितका साथै निको हुनेको संख्या पनि बढिरहेको छ ।

भारतमा अहिलेसम्म समग्र संक्रमितको संख्या दुई लाख सात हजार ६१५ पुगेको छ । पछिल्लो २४ घण्टामा भारतमा आठ हजार ९०९ नयाँ संक्रमित थपिएका हुन् । त्यस्तै अहिलेसम्म भारतमा कोरोना भाइरसबाट मृत्यु हुनेको संख्या पाँच हजार ८१५ पुगेको छ । पछिल्लो २४ घण्टामा भारतमा कोरोना भाइरसबाट २१७ जनाको मृत्यु भएको हो ।

भारतको सबैभन्दा प्रभावित महाराष्ट्रमा ७२ हजारभन्दा बढी मानिसमा कोरोना संक्रमण देखिँदा दुई हजार ४६५ जनाको मृत्यु भइसकेको छ । त्यस्तै तामिलनाडुमा २४ हजारभन्दा बढीमा संक्रमण देखिएको छ भने १९७ जनाको मृत्यु भइसकेको छ । दिल्लीमा पनि २२ हजारभन्दा बढी मानिसमा यसको संक्रमण देखिँदा ५५६ जनाको मृत्यु भएको छ । गुजरातमा १७ हजारभन्दा बढी मानिसमा कोरोना भाइरसको संक्रमण देखिँदा एक हजार ९२ जनाको मृत्यु भएको छ ।

पश्चिम बंगालमा ६ हजारभन्दा बढी मानिसमा कोरोना भाइरसको संक्रमण देखिँदा ३३५ जनाको मृत्यु भइसकेको छ । उत्तर प्रदेशमा आठ हजारभन्दा बढीमा संक्रमण देखिँदा २२२ जनाको मृत्यु भएको छ । बिहारमा चार हजार एक सयभन्दा बढी संक्रमित छन् भने २४ जनाको मृत्यु भएको छ ।