• अर्थ सरोकार सम्बाददाता 

काठमाडौं । स्वास्थ्य तथा जनसंख्या मन्त्रालयले कोरोना संक्रमितको दैनिक विवरण सार्वजनिक गर्दा नियमित जसो त्रुटि गर्न थालेको छ । मन्त्रालयले स्पष्टसँग नलेख्दा संक्रमित नै नभएको ठाउँका सर्वसाधारणमा त्रास फैलिएको छ ।

मन्त्रालयका सह–प्रवक्ता समिरकुमार अधिकारीको हस्ताक्षरसहित शुक्रबार बिहान ९ बजे सार्वजनिक भएको विज्ञप्तिमा गोडैता नगरपालिकाको ८, ९, ११, १३ र १४ नम्बर वडा र रामनगर बहुअर्वा गाउँपालिका–७ निवासी २२, २२, २४, २५, २५, २७, ३२, ३४, ३४, ३५, ३८, ३८, ३८र ४९ वर्षका र १८ वर्षीय महिला संक्रमित रहेको भनिएको छ ।

यो सूचना सार्वजनिक हुनेवित्तिकै सर्लाहीको रामनगरमा १५ संक्रमित भेटिएको हल्ला फैलियो । जसकारण गाउँमा त्रास सिर्जना भयो । रामनगर–७ का वडाध्यक्ष रामसोगारथ तेलीका अनुसार रामनगरबाट जम्मा परीक्षण भएको संख्या नै ११ जना थियो ।