काठमाडौँ – भाटभटेनी सुपरमार्केटले शुक्रबारदेखि उपत्यकाका ६ स्थानका आउटलेट खुल्ला गरेको छ । कम्पनीले उपत्यकाको कलंकी, पुल्चोक, महाराजगञ्ज, कोटेश्वर, टंगाल र भक्तपुर आउटलेट खुल्ला गरेको जनाएको हो । ललितपुरको सातदोबाटो तथा काठमाडौंको चुच्चेपाटी, बालाजु, अनामनगर र त्रिपुरेश्वरस्थित आउटलेट भने बन्द नै रहनेछन् । 

कम्पनीले उक्त आउटलेटहरु बिहान १० बजेदेखि साँझ ७ बजेसम्म खुल्ला हुने पनि बताएको छ। माहामारीको रुप लिइरहेको कोरोना भाइरस (कोभिड-१९) संक्रमणबाट बच्नका लागि कम्पनीले १ पटकमा १० जनालाई मात्र प्रवेश दिने भाटभटेनी सुपरमार्केटले बताएको छ । साथै ग्राहकहरुलाई सुपरमार्केटभित्र २० मिनेटभन्दा बढी नबस्न पनि आग्रह गरेको छ।

कम्पनीले आफुलाई चाहिने सामानको सूची घरबाटै तयार परेर ल्याउन ग्राहकलाई अनुरोध गरेको छ । प्रवेशअघि ग्राहकको ज्वरो परीक्षण गरिने र ह्याण्ड सेनिटाइजर प्रयोग गरेपछि मात्र सुपरमार्केटमा प्रवेश गराइने कम्पनीले जनाएको छ। कम्पनीले आफ्ना ग्राहकलाई आफूलाई पायक पर्ने स्थानमा गएर सामग्री खरिद गर्न आग्रह गरेको छ।