">
- अर्थ सरोकार सम्बाददाता
पाँचथर – फिदिम नगरपालिका–५ का वडाअध्यक्ष लीलाराज तुम्बापोको निधन भएको छ । ३५ वर्षिया उनको झापाको बिर्तामोडस्थित बीएण्डसी अस्पतालमा उपचारको क्रममा शुक्रबार निधन भएको हो । बिहीबार सिकिस्त बिरामी भएपछि फिदिमस्थित समर्पित अस्पताल भर्ना गरिएका तुम्बापोको स्वास्थ्यमा सुधार नआएपछि साँझ हेलिकप्टरमार्फत बीएण्डसी अस्पताल लगिएको थियो ।
बीएण्डसी अस्पतालका जनसम्पर्क अधिकृत प्रमिश गिरीले दिएको जानकारी अनुसार भेन्टिलेटरमा राखेर उपचारका क्रममा तुम्बापोको शुक्रबार दिउँसो साढे दुई बजे अस्पतालले मृत घोषणा गरेको बताए । उनको शव शुक्रबारै पाँचथर ल्याइने हाल बीएण्डसी अस्पतालमै रहेका सुमन तुम्बापोले बताए । राष्ट्रिय युवा संघ पाँचथरका सह–संयोजकसमेत रहेका तुम्बापो गत स्थानीय तह निर्वाचनमा नेपाल कम्युनिष्ट पार्टी (नेकपा)को तर्फबाट फिदिम–५, को वडा अध्यक्षमा निर्बाचित भएका थिए ।
गम्भीर बिरामी भएर उपचारका क्रममा बाबुको निधन हुनु केहीघण्टा उनी घरमा दोश्रो सन्तानका रुपमा छोरीको जन्म भएको थियो । शुक्रबार बिहान ३ बजेको समयमा छोरीको जन्म भएको आफन्त इन्दिरा तुम्बापोले बताइन् ।अब उनको परिवारमा अब दुई छोरी भएका छन्।
