काठमाडौं – कृषि विकास बैंकले आर्थिक वर्ष २०७६/७७ को दोस्रो त्रैमासको वित्तीय विवरण सार्वजनिक गरेको छ । बैंकले १ अर्ब ५८ करोड १७ लाख रुपैयाँ खुद नाफा आर्जन गरेको वित्तीय विवरण सार्वजनिक गरेको हो । बैंकको यो नाफा गत वर्षको सोहि अवधिको तुलनामा २२.८०% ले धरै हो । 

अघिल्लो आर्थिक वर्षको यसै अवधिमा बैंकले १ अर्ब २८ करोड ८० लाख रुपैयाँ खुद नाफा कमाएको थियो । जगेडा कोषमा १० अर्ब ४१ करोड रुपैयाँ रहेको यस बैंकको प्रतिसेयर आम्दानी ६ रुपैयाँ ५१ पैसाले बढेर ३१ रुपैयाँ ४७ पैसा पुगेको छ । साथै खराब कर्जा ३.९१% मा कायम भएको हो ।

सार्वजनिक वित्तीय विवरण अनुसार वितरण योग्य नाफा १ अर्ब १४ करोड ८३ लाख रुपैयाँ रहेको छ । खुद ब्याज आम्दानीमा भने गिरावट आएको छ । बैंकको उक्त सूचक ९.२५% ले घटेको हो । यस्तै सञ्चालन नाफा भने १६.०७% ले बढेको छ । १ खर्ब २७ अर्ब २१ करोड निक्षेप संकलन गरेको बैंकले १ खर्ब १५ अर्ब ३६ करोड कर्जा लगानी गर्न सफल भएको छ । बैंकले निक्षेप १५.५१% र कर्जा लगानी ७.५०% का दरले बढाएको हो ।

हाल यस बैंकको चुक्ता पूँजी १४ अर्ब ४४ करोड ८२ लाख रहेको छ ।