काठमाडौं – आदर्श लघुवित्त वित्तीय संस्थाले आर्थिक वर्ष २०७६/७७ को दोस्रो त्रैमासको वित्तीय विवरण सार्वजनिक गरेको छ । सार्वजनिक भएको विवरण अनुसार संस्थाको खुद नाफा १२ लाख २ हजार रुपैयाँ कमाएको छ । यो नाफा गत वर्षको तुलनामा १६३.५९% ले धेरै हो । गत वर्षको यस अवधिमा कम्पनीले ४ लाख ५६ हजार रुपैयाँ नाफा कमाएको थियो । 

यस्तै, संस्थाको खुद ब्याज आम्दानी र सञ्चालक नाफा क्रमश: ७५.५६% र १६३.४५%ले बढेको छ । गत वर्ष ४१ लाख ४९ हजार रुपैयाँ मात्र खुद ब्याज आम्दानी गरेको कम्पनीले यो वर्ष बढाएर ७२ लाख ८४ हजार रुपैयाँ पुर्याएको छ । साथै सञ्चालन नाफा पनि ७ लाख १७ हजार रुपैयाँबाट बढेर १८ लाख ८९ हजार रुपैयाँ पुगेको छ । 

यो दोस्रो त्रैमाससम्म बैंकले १० करोड ४० लाख ७ हजार रुपैयाँ निक्षेप संकलन गरी १२ करोड १४ लाख ६६ हजार रुपैयाँ कर्जा प्रवाह गरेको छ । हाल यसको चुक्ता पुँजी १ करोड ४० लाख रुपैयाँ रहेको छ भने जगेडा कोषमा २९ लाख ३४ हजार रुपैयाँ छ ।

यता, खराब कर्जा भने गत वर्षको भन्दा ०.३७% ले बढेको छ । गत वर्ष १.३७% रहेको यसको खराब कर्जा यो त्रैमासमा बढेर १.७४% पुगेको छ ।