काठमाडौँ । चन्द्रागिरी नगरपालिका–७ स्थित सिटिजन्स बैंकको एटीएम मेसिनबाट पैसा चोर्दा चोर्दै केहि दिनअघि प्रहरीले २ किशोरलाई पक्राउ गर्यो । मुगुकाे सोरु गाउँपालिका वडा–६ घर भइ हाल चन्द्रागिरी ५ स्थित दाउराडिपो बस्ने २४ वर्षीय चित्र बहादुर शाही र २० वर्षीय नन्दराज धराललाई प्रहरीले पक्राउ गरेर थप अनुसन्धान गरिरहेको छ । गत शनिबार उनीहरुलाई प्रहरीले पक्राउ गरी आइतबार सार्वजनिक गरेको थियो ।
थानकोट चेकपोस्ट नजिकै रहेको एटीएम मेसिनबाट पैसा निकाल्न फुटाइसकेको अवस्थामा प्रहरीले उनीहरुलाई रंगेहात पक्राउ गरेको थियो । प्रहरीले उनीहरुले एटीएम मेसिन फुटाउन प्रयोग गरेको ढुंगा, पिलास, फलाको रेन्च, काठको बिड भएको धारिलो हतियार चक्कु समेत बरामद गरेको छ ।
हिरासतभित्रै ठट्टा गर्नुले के संकेत गर्छ ?
तर यसरी पक्राउ परी सार्वजनिक भएका उनीहरुलाई आफुले गरेको गल्तीको भित्री रुपमा पछुतो छैन कि भन्ने देखिएको छ । प्रहरी स्रोतका अनुसार हिरासतभित्रै दुइ जना बेला बेला ‘हामी यस्तै त हो नि ब्रो’ भन्दै ठट्टासमेत गरिरहेका छन् । यसले उनीहरु यो प्रकरण बाट छुटेपछि पुन: यस्तै काममा लाग्ने त होइनन् भन्ने आशंकासमेत बढेको छ । प्रहरीले उनीहरुमाथि मुद्धा चलाएको छ ।
