• अर्थ सरोकार सम्बाददाता

काठमाडौँ । खाने तेलको मूल्य फेरि बढेको छ । बजारमा खाने तेलको मूल्य अधिकतम २५ रुपैयाँले बढेको पाइएको हो । नेपाल खुद्रा व्यापार सङ्घका अनुसार पछिल्लो समय बजारमा खाने तेलको मूल्य न्यूनतम १० रुपैयाँदेखि अधिकतम २५ रुपैयाँले बढेको हो ।

संघका अनुसार तोरीको तेल प्रतिलिटर १० देखि २५ रुपैयाँले बढेको छ भने सनफ्लावर तेल १५ देखि २० रुपैयाँले बढेको छ भने सोयाबिन (भट्मास) को तेलमा प्रतिलिटर १५ रूपैयाँले वृद्धि भएको छ । बढोत्तरीपछिको मूल्य  तोरीको तेल प्रतिलिटर २५० देखि २८० रुपैयाँ, सनफ्लावर तेल २३० देखि २५० रुपैयाँ र सोयाबिन (भटमास) को तेल प्रतिलिटर २२५ देखि २३५ रुपैयाँ कायम भएको छ ।

यसअघि तोरीको तेल प्रतिलिटर अधिकतम २४० रुपैयाँ, सनफ्लावर तेल २३० रुपैयाँ र भट्मासको तेल २१० रुपैयाँ थियो  पछिल्लो समय नेपाली बजारमा अधिकांश वस्तुको मूल्य बढेको छ । बजारमा  मासु, तरकारी, फलफुल, गेडागुडीलगायतका वस्तुको मूल्य ह्वात्तै बढेको छ । व्यवसायीहरुले मनपरी मूल्य लिँदा सम्बन्धित निकाय भने मौन अवस्थामा बसेका छन् । जसले गर्दा आम उपभोक्ता भनी महँगीको मारमा परेका छन् ।