">
काठमाडौँ – प्रमुख प्रतिपक्षी दल नेपाली कांग्रेसका सभापति तथा पूर्वप्रधानमन्त्री शेरबहादुर देउवा र चिनियाँ प्रतिनिधिमण्डलबीच भेटवार्ता भएको छ । सोमबार बिहान चिनियाँ कम्युनिष्ट पार्टीका विदेश विभाग उपमन्त्री वाङ यजुन नेतृत्वको प्रतिनिधिमण्डलले सभापति देउवासँगउनकै निवास बुढानिलकण्ठमा भेटवार्ता गरेको हो ।
भेटका क्रममा चिनियाँ कम्युनिष्ट पार्टीका उपमन्त्री वाङले नेपालमा आफूहरुको सबैभन्दा पुरानो सम्बन्ध कांग्रेससँग रहेको स्मरण गर्दै दुई पार्टीबीचको लामो समयदेखिको सम्बन्धलाई थप प्रगाढ गर्दै लैजाने बताएका छन् ।
उनले भेटका क्रममा चिनियाँ कम्युनिष्ट पार्टीका संस्थापक नेता माओ–त्से–तुङ र कांग्रेसका संस्थापक नेता वीपी कोइरालाबीचको सम्बन्ध स्मरण गरेको सभापति देउवाका प्रेस सहयोगी गोविन्द परियारले जानकारी दिए ।
‘भेटमा चिनियाँ प्रतिनिधिमण्डलले नेपालमा कांग्रेससँग पहिलो राजनीतिक सम्बन्ध भएको भन्दै दुई पार्टीबीच एक्सटेन्सन प्रोग्रामहरु गर्ने र दुई दलबीचको लामो सम्बन्धलाई थप मजबुत पारेर अगाडि लैजाने बारेमा कुराकानी भयो,’ उनले भने ।
कांग्रेस सभापति देउवा र चिनियाँ कम्युनिष्ट पार्टीका उपमन्त्री वाङ नेतृत्वको टोलीबीच नेपाल सरकार र चिनियाँ सरकारबीच द्विपक्षीय हितलाई थप प्रगाढ बनाउने बारेमा पनि छलफल भएको थियो ।
भेटमा पूर्वप्रधानमन्त्री देउवाले चीनले पछिल्लो समयमा गरेको प्रगतिबाट नेपाल खुशी भएको बताउँदै चीनको प्रगतिबाट नेपाल पनि कुनै न कुनै माध्यमबाट लाभान्वित हुनुपर्ने बताएको प्रेस सहयोगी परियारले जानकारी दिए ।
