काठमाडौं – साउन १७ गतेदेखि आँखुखोला जलविद्युत कम्पनी लिमिटेडले आयोजना प्रभावित बासिन्दाका लागि ८ लाख कित्ता आइपीओ बिक्री गर्ने भएको छ । उक्त सेयर कम्पनीले धादिङ जिल्लाका स्थानीयबासीलाई बिक्री गर्न लागेको हो । यो आइपीओ न्यूनतम ५० कित्तादेखि अधिकतम ४ हजार कित्तासम्म भर्न सकिनेछ । यसमा साउन ३१ गतेसम्म आवेदन दिन पाइन्छ । यस अवधिमा आवश्यक मात्रामा आवेदन नपरेमा भदौ १५ गतेसम्म भर्न सकिन्छ ।

लगानीकर्ताले धादिङ जिल्लामा रहेका मुक्तिनाथ विकास बैंक, सिभिल बैंक र प्रभु बैंकका शाखाबाट आइपीओ भर्न सक्नेछन् । यसैगरी, आँखुखोलाको आयोजना स्थलमा रहेको कार्यालयबाट पनि आइपीओ भर्न पाउने व्यवस्था गरिएको छ । यो आइपीओको बिक्री प्रबन्धक सिभिल क्यापिटल हो ।

धितोपत्र बोर्डबाट अनुमति पाउन पनि धेरै समय लगाएको आँखुखोला विभिन्न विवादमा पर्दै आएको छ । क्रेडिट रेटिङ एजेन्सी इक्रा नेपालले पनि आँखुखोलाको आइपीओलाई कमजोर आधार जनाउने ग्रेड ५ रेटिङ दिएको छ । कम्पनीले जारी पुँजी ८० करोडको १०% सेयर स्थानीयलाई बिक्री गर्न लागेको हो । यो आइपीओ बिक्री पछि फेरि सर्वसाधारणलाई अर्को आइपीओ जारी गर्नुपर्ने हुन्छ । हाल यो कम्पनीले ८.४ मेगावाटको आँखुखोल–१ जलविद्युत आयोजना सञ्चालन गरिरहेको छ ।