काठमाडौँ – सरकारले भारतका लागि राजदूत पदमा पूर्व प्रमुख निर्वाचन आयुक्त नीलकण्ठ उप्रेतिलाई सिफारिश गरेको छ । सोमवार बसेको मन्त्रिपरिषद्को बैठकले उप्रेतिलाई भारत र पूर्व राजदूत उदयराज पाण्डेलाई मलेसियाका लागि राजदूत सिफारिश गरेको परराष्ट्र मन्त्री प्रदीप ज्ञवालीले जानकारी दिए ।

सोमवारको मन्त्रिपरिषद्को बैठकले राजदूतको वर्गीकरण नगर्ने निर्णय पनि गरेको छ । यस अघि भारतका लागि राजदूत रहेका दीपकुमार उपाध्यायले नेपाली कांग्रेसबाट चुनाव लड्नका लागि राजीनामा दिएपछि राजदूत पद खाली रहेको थियो ।

मलेसियाका लागि राजदूत सिफारिश भएका पाण्डे यसअघि साउदी अरेबियाका राजदूत भइसकेका थिए । सम्बन्धित देशबाट एग्रिमो आइसकेपछि मात्र ती देशहरुमा राजदूत नियुक्त हुने गर्छ ।

भारत र मलेसियाका लागि राजदूत सिफारिश भइसकेपछि अब अमेरिका र साउदी अरबका लागि राजदूत सिफारिश हुन बाँकी छ ।