">
काठमाडौं – साताब्यापी चीन भ्रमणमा रहेका प्रधानमन्त्री केपी ओलीले चीनिया अधिकारीहरुसँग भारतको प्रसंग उठाएका छन् । दुई देशबीचको संवादमा प्रायः तेस्रो मुलुकका बिषयमा छलफल गरिदैन तर प्रधानमन्त्री ओलीले चिनियाँ पक्षसँग भारतको प्रसंग उठाएका छन् ।
नेपाल दुईमध्ये एकसँग निकट भएको देखिँदा बेइजिङ र दिल्ली दुवै सशंकित हुने भएपछि ओलीले बेइजिङमा दिल्लीको प्रसंग उठाएका थिए । ओलीले उदीयमान महाशक्तिबीच सन्तुलन मिलाउने प्रयासका रूपमा ओलीले दिल्लीको प्रसंग उठाएको कतिपय जानकारहरुले बताएका छन् ।
ओलीसँगै भ्रमणमा रहेका परराष्ट्रमन्त्री प्रदीप ज्ञवालीले नेपाली पक्षको आग्रहप्रति चीनको नेतृत्व तहले सकारात्मक प्रतिक्रिया जनाएको र नेपाल, भारत तथा चीनबीच त्रिदेशीय साझेदारीमा जोड दिएको बताए ।
प्रधानमन्त्रीका रूपमा ओलीले दुई वर्षअघि गरेको पहिलो चीन भ्रमणमा चिनियाँ राष्ट्रपति स्वयंले भारत र चीनको विकासबाट लाभ लिन नेपाललाई आग्रह गर्नुका साथै त्रिदेशीय साझेदारीका विषय उठाएका थिए।
परराष्ट्रमन्त्री ज्ञवालीले भने, पछिल्लो समयमा भारत र चीनबीच जुन किसिमको भेटवार्ता र समझदारी बढ्दै गएको छ, त्यसको हामी स्वागत गर्छौँ। र, त्यस्तो खाले सहकार्यले समग्र दक्षिण एशियाली क्षेत्रमा सकारात्मक प्रभाव पर्छ। उनका अनुसार त्यसैले नेपाली पक्षले भारत र चीनबीच प्रतिस्पर्धा होइन, सहयोग रहेको हेर्न चाहेको चीनको नेतृत्वलाई बतायो।
