काठमाडौं – नेपाल टेलिकमले आफ्नो मोवाइल फोन सेवा लिइरहेका ग्राहकहरुलाई मोबाइलमा कुरा गर्दागर्दै ‘ब्यालेन्स’ सकिएर फोन काटिने समस्याबाट मुक्त दिएको छ ।
नेपाल टेलिकमले शुक्रबारदेखि सापटी लिन मिल्ने सेवाअन्तर्गत आफ्ना नमस्ते प्रिपेड मोबाइलका ग्राहकहरुलाई यो सुविधा प्रदान गरेको हो । शुक्रबार टेलिकममा आयोजित एक कार्यक्रमकाबीच सञ्चार राज्यमन्त्री गोकुल बास्कोटाले ‘नमस्ते क्रेडिट सेवा’ योजनाको उदघाटन गरेर औपाचारिक रुपमा यो सेवा सुरु गरिएको हो ।
यस योजनाअन्तर्गत ग्राहकले ५ रूपैयाँदेखि ४० रूपैयाँसम्म सापटी ब्यालेन्स पाउनेछन् भने ब्यालेन्स सकिएपनि ढुक्कसँग आफ्नो कुरा पूरा गर्न सक्ने टेलिकमले जनाएको छ । ग्राहकले खर्च गरिसकेको ब्यालेन्स रकमका आधारमा ग्राहकलाई छुट्टाछुट्टै रकम बराबरको सापटी सेवा दिनेछ । ग्राहकले ब्यालेन्स सकिएपछि प्रयोग गरेको ‘टक टाइम’ बराबरको पैसा भने पछि रिचार्ज गरेपछि प्राप्त ‘ब्यालेन्स’बाट काटिने टेलिकमले जनाएको छ ।
त्यसनिम्ति नमस्ते क्रेडिट सेवा लिन प्रयोगकर्ताले आफूले कति रकम बराबरको सेवा लिन सकिन्छ भन्ने जानकारी आफ्नो मोबाइलमा स्टाटस (status) टाइप गरी १४७७ मा एसएमएएस पठाउनुपर्ने हुन्छ । सेवा स्वतः एक्टिभ हुने भएकाले यो लिन नचाहनेले स्टप(stop) टाइप गरी १४७७ मा एसएमएस पठाउन सक्ने छन् ।
उधारो ब्यालेन्सको सुविधामा ग्राहकपिच्छे फरक–फरक रकमको सीमा तोकिएको छ । साथै यो सुविधा टेलिकमको प्रिपेडमा मात्रै लागू हुनुका साथै नेटवर्कमा सीम ‘एक्टिभ’ भएको तीन महिना पुगेकाले मात्रै यो सेवा पाउने छन् ।
साथै सापटीबापत पाइने रकम डाटा र एसएमएसमा पनि प्रयोग गर्न सकिने कार्यक्रममा टेलिकमले जानकारी दिएको छ । यो सेवाबाट टेलिकमका धेरै उपभोक्ता लाभान्वित हुने विश्वास टेलिकमले लिएको छ ।
