काठमाडौं – एनआइसी एसिया ग्रोथ फन्डले खुला गरेको ८ करोड ५० लाख इकाईमा आवेदन दिने आइतबार अन्तिम दिन हो । यस फन्डले माघ २ गतेदेखि निष्कासन गरेको १० करोड इकाईमध्ये १५% (१ करोड ५० लाख इकाई) कोष प्रवद्र्धक एनआइसी एसिया बैंकलाई छुट्याएर बाँकी रहेको ८ करोड ५० लाख इकाई सर्वसाधारणमा बिक्री गरेको हो ।

योजना व्यवस्थापक एनआइसी एसिया क्यापिटलले यसअघि छिटोमा माघ ८ गते र ढिलोमा माघ २१ गतेसम्म आवेदन दिन सकिने व्यवस्था गरेको थियो । यो अवधिमा सबै इकाई नबिकेपछि म्याद थप गरी फागुन १३ गतेसम्म पुर्याइएको हो । यो फन्डमा प्रतिइकाई १० रुपैयाँ दरले आवेदन दिन सकिन्छ । यसमा न्यूनतम १०० इकाईदेखि अधिकतम २० लाख इकाईसम्मका लागि आवेदन दिन पाउने व्यवस्था छ ।

आस्वा सदस्य सम्पूर्ण बैंक तथा वित्तीय संस्थाबाट आवेदन दिन सकिनेछ । एनआइसी एसिया ग्रोथ फन्ड बन्दमुखी ७ वर्षे योजना हो । यो फन्डको कोष व्यवस्थापक एनआइसी एसिया क्यापिटल हो । एनआइसी एसियाको व्यवस्थापनमा सञ्चालन हुन लागेको यो पहिलो म्युचुअल फन्ड हो ।