भरतपुर  – शनिबार माओवादी केन्द्रमा प्रवेश गरेका राप्रपा प्रजातान्त्रिकका चितवन जिल्ला अध्यक्ष बद्री तिमिल्सिनाले आफू माओवादी केन्द्रमा प्रवेश गरेपछि राप्रपाको कार्यालयमा ताल्चा लागेको बताएका छन् ।

आइतबार चितवनको चनौलीमा आयोजित चुनावी सभामा बोल्दै नेता तिमिल्सिनाले भने, “हिजोसम्म म राप्रपामा थिएँ, अघिल्लोपटक बिक्रम पाण्डेलाई जिताएँ, यसपटक प्रचण्डलाई जिताएर चितवनको मुहार फेरिएको हेर्न चाहन्छु। कतिपयले भन्छन्, बिक्रम पाण्डेले चुनाव जित्छ । तर, म माओवादीमा आएपछि राप्रपाको कार्यालयमा ताल्चा लागेको छ । अब हामी २० हजार मत अन्तरभन्दा बढी मतले प्रचण्डलाई जिताएर देखाउँछौं ।”

“देशको राजनेतालाई जिताउनु हुन्छ कि ठेकेदारलाई जिताउनु हुन्छ ? ठेकेदारले चितवनको विकास गर्छ भन्ने कल्पना गर्न सकिएला ? नेता तिमिल्सिनाले भने, “प्रचण्ड देशको राजनेता हो । बरु प्रचण्डका लागि चितवन नचाहिन सक्छ । तर, चितवनका लागि प्रचण्ड चाहिन्छ। प्रचण्डले जिते मात्रै चितवन फेरिन्छ, देश फेरिन्छ ।”

कार्यक्रममा एमाले नेता देवी ज्ञवालीले कम्युनिष्टहरुको एउटै केन्द्र बनाउने आफ्नो अधुरो सपना ओली र प्रचण्डले पूरा गर्न लागेकाले आफूले प्रचण्डलाई जिताउन कम्मर कसेको बताए ।