काठमाडौँ – सरकारको नयाँ मुख्यसचिवमा लोकदर्शन रेग्मीलाई नियुक्त गरिएको छ । सोमबार बसेको मन्त्रीपरिषदको बैठकले गृहसचिव रहेका रेग्मीलाई मुख्यसचिवमा बढुवा गर्ने निर्णय गरेको हो ।

उमेर हदका कारण मुख्यसचिव राजेन्द्रकिशोर क्षेत्रीले अनिवार्य रुपमा अवकाश लिने भएपछी २४ औं मुख्यसचिवमा रेग्मी नियुक्त भएका हुन् ।रेग्मीसँगै ङइन्द्रप्रसाद उपाध्याय र शंकर अधिकारी मुख्यसचिवको प्रतिष्पर्धामा थिए । तर, वरियताक्रममा तेस्रो स्थानमा रहेका रेग्मीले बाजी मारे । मुख्यसचिवको आकांक्षी तीनै सचिव २०७० साउन ६ गते सचिवमा बढुवा भएका थिए । वरियताक्रममा उपाध्याय पहिलो, अधिकारी दोस्रो र रेग्मी तेस्रो स्थानमा छन् ।

त्यसैगरी वन मन्त्रालयका प्रकाश माथेमालाई पशुपंक्षी मन्त्रालयमा, लोकसेवा आयोगका मधुप्रसाद रेग्मीलाई शिक्षा मन्त्रालयमा, पशुपंक्षीका युवकध्वज जिसीलाई वनमन्त्रालयमा सरुवा गरिएको छ । सामान्य प्रशासनको जिम्मेवारी रेश्मीराज पाण्डेलाई दिइएको छ । सरकारले पुनर्निर्माण प्राधिकरणका सिइओ गोविन्दराज पोखरेलको राजीनामा स्वीकृत गरी तत्कालका लागि पूर्वसचिव युवराज भूषाललाई प्राधिकरणको नेतृत्वको जिम्मेवारी दिएको सञ्चारमन्त्री मोहनबहादुर बस्नेतले जानकारी दिएका छन् । – एस काठमाडौँ