काठमाडौं – नेकपा माओवादी केन्द्रका अध्यक्ष पुष्पकमल दाहाल प्रचण्ड एमाले अध्यक्ष केपी शर्मा ओलीलाई सराप्दै दुई साता प्रदेश नम्वर २ मा बसेर भर्खरै राजधानी फर्के । दाहाल फर्के लगतै एमाले अध्यक्ष ओली मधेस छिर्ने तयारी गरेका छन् ।
‘अध्यक्षदेखि सवै प्रभावशाली नेताहरु अब मधेस जाने कार्यक्रम तय भएको छ’ एमाले प्रचारविभागका प्रमुख योगेश भट्टराइले भने ‘एमालेप्रति माओवादी, कांग्रेस र मधेसी दलले लगाएका सवै आरोपको खण्डन र प्रतिवाद गर्छाै ।’
दुई साता मधेसका ८ जिल्लामा बिताएका माओवादी केन्द्रका अध्यक्ष दाहालले एमाले अध्यक्ष ओलीलाई हिटलर, नक्कली राष्ट्रबाद, नश्लवाद जस्ता आरोप लगाएका थिए । माओवादी मात्र मधेसीका पक्षमा भएको दावी गरेका प्रचण्डको आरोपलाई प्रतिवाद गर्न एमाले अध्यक्ष ओली वीरगन्ज पुग्ने भएका छन् ।
ओलीसहित नेता माधवकुमार नेपाल, झलनाथ खनाल, उपाध्यक्ष बामदेव गौतम, महासचिव इश्वर पोखरेल, सवै सचिवहरु मधेस झर्ने भएका छन् । ‘बुधबारदेखि नै हामी २ नम्वर प्रदेशको चुनावी अभियान थाल्छौ’ सचिव भट्टराईले भने ।
प्रदेश नम्वर २ मा एमालेबिरुद्ध नेपाली कांग्रेस, नेकपा माओवादी केन्द्रले मोर्चा कसेका छन् । उनीहरुको मोर्चालाई असफल पार्न संघिय समाजबादी फोरम, राजपा र राप्रपासँग चुनावी तालमेल गर्ने नीति एमालेले लिएको छ । एमाले बलियो भएका स्थानमा कांग्रेस र माओवादी केन्द्रले चुनाव तालमेल गरेका छन् । – एस काठमाडौँ
