काठमाडौँ – वैदेशिक रोजगारमा पठाउने भन्दै करोडौं रुपैया ठगी गरेर अमेरिका जान तयार रहेका ईश्वरीप्रसाद पोखरेल बिहीबार राजधानीको कमलपोरीबाट पक्राउमा परेका छन् ।

इजरायल र कोरिया पठाउने भन्दै उनले एक करोड ५ लाख रुपैंया ठगी गरेको महानगरीय प्रहरी अपराध महाशाखाले बताएको छ । उनले २३ जनासँग १ करोड ५ लाख रकम लिएर अमेरिका भाग्ने तयारीमा थिए ।

प्रहरीका अनुसार प्युठानका पोखरेलले सन्दीप दर्नाल, भीमबहादुर दर्जी, शान्ति राई, समेत २३ जनालाई इजरायल पठाउने भन्दै रकम लिएर फरार रहेका भएका थिए । सुदिपराज पन्तलाई कोरिया पठाउने भन्दै ३ लाख, रोजन लामालाई राष्ट्रिय अनुसन्धान विभागमा जागिर लगाइदिने भन्दै २ लाख ५० हजार लिएर ठगी गरेका थिए ।

अहिले,उनीविरुद्ध जिल्ला अदालत बाँकेमा समेत ठगी मुद्दा चलिरहेको छ । उनले बैंकिङ प्रयोजनका लागि ग्रिनसिटी, कृषि फर्म र बाख्रा प्रशोधन केन्द्र दर्ता गरी विभिन्न बैंक, वित्तीय संस्था र ब्यक्तिसँग पैसा लिएर ठगेको महाशाखाले सार्वजनिक गरेको विवरणमा उल्लेख गरिएकोछ ।