काठमाडौँ – कृषि बिकास बैंकले आफ्नो स्वर्ण जयन्ती समारोहमा नेपाल राष्ट्र बैङ्कलाई निम्तोनै नपठाएको खुलासा भएको छ । बैंकले शुक्रबार आयोजना गरेको ५०औँ वार्षिकोत्सव समारोहमा राष्ट्र बैङ्कका गभर्नर नदेखिएपछी यसबारे विभिन्न सरोकारवालाहरुले खोजीनीति गरेका थिए ।

‘गभर्नर किन आएनन् भन्ने बुझ्दा नेपाल राष्ट्र बैंकलाइ निम्तोनै नपठाएको थाहा भयो । समारोहको कार्यक्रम तालिकामानै गभर्नर र राष्ट्र बैङ्कका प्रतिनिधिको नाम उल्लेख नभएको देखिएपछि निम्तो नपठाउनु ‘नियोजित’ भएको बुझिएको छ । ‘ समारोहमा उपस्थित एक सहभागीले अर्थ सरोकार डटकमसँग भने ।  

उनका अनुसार बैंकका सीईओ लीलाप्रकाश सिटौला र गभर्नर डा. चिरञ्जिवी नेपालको सम्बन्ध राम्रो नरहेका कारण नेपाल राष्ट्र बैंकलाई निम्तोनै पठाईएको थिएन । समारोहका लागि  अर्थमन्त्री कृष्णबहादुर महरा, अर्थ मन्त्रालयका सचिवद्वय शान्तराज सुवेदी र राजन खनाल, पूर्वगभर्नरद्वय दिपेन्द्रपुरुष ढकाल र डा. तिलक रावल, नेपाल धितोपत्र बोर्डका अध्यक्ष डा. रेवतबहादुर कार्की लगायतलाई बोलाइएको थियो । 

समारोहमा बैङ्कले अर्थ मन्त्रालय र मातहतका निकायका अध्यक्ष, महाप्रबन्धक, कार्यकारी निर्देशक, प्रमुख कार्यकारी अधिकृत र प्रशासकसहित २५ जनालाई अतिथिका रूपमा निम्तो दिएको थियो ।