अमिताभ बच्चनले ‘ब्ल्याक’ फिल्म सित्तैमा अभिनय गरेको खुलासा गरेका छन् । सञ्जयलीला भन्साली निर्देशित ब्ल्याक १२ वर्षअघि बनेको थियो । आफू भन्सालीको फिल्ममा काम गर्न लालायित भएकाले उनले सो फिल्मको अफर गर्दा पैसाको डिमान्ड नगरेको अमिताभले बताएका छन् ।
‘म भन्सालीसँग काम गर्न आतुर थिएँ । उनले मलाई रोल अफर गरे, मैले पैसाको कुरा गरिनँ,’ ७४ वर्षीया अमिताभले आफ्नो ब्ल्याक समर्पित ब्लकमार्फत खोलेका छन्, ‘मैले विनापारिश्रमिक ब्ल्याकमा काम गरेँ । एउटा राम्रो फिल्मको हिस्सा बन्न पाएकोमा म गर्व महसुस गर्छु ।’
अमेरिकी लेखिका हेलेन केलरको जीवनीमा आधारित ब्ल्याकमा रानी मुखर्जी दृष्टिविहीन युवतीको भूमिकामा छिन् । अमिताभले उनको शिक्षकको भूमिका निर्वाह गरेका छन् । फिल्म सुपरहिट भएको थियो । सो फिल्ममा अहिलेका चर्चित अभिनेता रणवीर कपुर भन्सालीका सहायक निर्देशक थिए ।
अमिताभले ब्ल्याकको प्रिमियरको दिन आफ्ना लागि विशेष भएको उल्लेख गरेका छन् । उनले सो प्रिमियरमा आफ्ना आदर्श अभिनेता दिलीपकुमार उपस्थित भएकोमा निकै खुसी मानेका छन् । दिलीपकुमारले आफ्नो अभिनयको तारिफ गरेको पल पनि उनलाई यादगार छ । ब्ल्याक फिल्मबाट अमिताभले दोस्रोपटक सर्वश्रेष्ठ अभिनेताको राष्ट्रिय पुरस्कार प्राप्त गरेका थिए ।
