भक्तपुर- भक्तपुरमा बाम गठबन्धन टुटेको छ । भक्तपुर क्षेत्र नं १ को प्रदेश क मा एमालेका बागी उम्मेदवारले उम्मेदवारी फिर्ता नलिएपछि भक्तपुरमा एमाले र माओवादी केन्द्रबीचको गठबन्धन टुटेको हो । एमाले चाँगुनारायण नगर समितिका पूर्वअध्यक्ष रमेश बुढाथोकीले स्वतन्त्र उम्मेदवारी दिएका हुन् । त्यसलगत्तै, माओवादी केन्द्र भक्तपुरले बाम गठबन्धन टुटेको घोषणा सार्वजनिक गरेको हो ।
एमालेले आइतबारसम्ममा उम्मेदवारी फिर्ता हुने आश्वासन दिएको तर उम्मेदवारी फिर्ता नगरेर माओवादी केन्द्रलाई धोका दिएको जिल्ला सचिवालय सदस्य सुनिल गोठेले दावी गरेका छन् । माओवादी केन्द्रले एमालेले षडयन्त्र गरेको भन्दै गठवन्धन टुटेको घोषणा गरेको हो ।
यता एमाले भक्तपुरले भने गठबन्धन कायमै रहेको दावी गरेको छ। एमाले जिल्ला अध्यक्ष राजेन्द्र राजथलाले निर्वाचन क्षेत्र नं १ को प्रदेश क मा परेको उम्मेदवारी फिर्ता नभएकै कारण गठबन्धन नटुट्ने बताएका हुन्।
