काठमाडौं । नेपाल राष्ट्र बैंकले यस वर्षको दशैँ र तिहारका लागि असोज १० गतेदेखि नयाँ नोट साट्ने भएको छ । हरेक वर्ष राष्ट्र बैंकले दशैँ र तिहारको अवसरमा नयाँ नोट बजार पठाउदै आइरहेको छ । र यस वर्ष पनि नयाँ नोट वितरणका लागि आन्तरिक तयारी पूरा भइसकेको राष्ट्र बैंकले जनाएको छ ।
राष्ट्र बैंकले सर्वसाधारणलाई ५, १०, २०, ५० र १०० दरका सय–सय थान नोट सटही सुविधा दिनेछ । एक व्यक्तिले बढीमा १८ हजार ५ सय रुपैयाँ नयाँ नोट पाउनेछन् । राष्ट्र बैंकले विगतमा थापथलिस्थित कार्यालयबाट नोट सटही सुविधा दिँदै आएको थियो भने यो वर्ष बालुवाटार कार्यालयबाट पनि नयाँ नोट सटहीको व्यवस्था मिलाइएको बताइएको छ ।
राष्ट्र बैंकको यो वर्ष १३ अर्ब रुपैयाँका नयाँ नोट वितरण गर्ने योजना रहेको छ । नयाँ नोट लिएका वित्तीय संस्थाले पनि असोज १० गतेदेखि मात्रै नोट सटही सुरु गर्नेछन् ।
