हेटौँडा । मोफसलमा रहेका बैंकक शाखा कति सुरक्षित छन् त ? भन्ने प्रश्न उठिरहेका बेला हेटौँडाको नेपाल बैंकमा म्यानेजरलाई काट्छु भन्दै खुकुरी बोकेर जाने एकजनालाई प्रहरीले पक्राउ गरेको खबर छ । प्रहरीले  खुकुरी लिएर ‘आज म्यानेजरलाई काट्छु’ भन्दै नेपाल बैंकको हेटौँडा शाखामा पुगेका गजेन्द्रराज गिरीलाई पक्राउ गरेको हो ।  हेटौँडा उपमहानगरपालिका वडा नंबर ४ चिल्ड्रेन पार्क ठेगाना रहेका गजेन्द्रराज गिरीलाई पक्राउ गरी थप अनुसन्धान भइरहेको प्रहरीको भनाइ छ ।

उनी गत फागुन १ गते गरगहना धितो राखेर ऋण माग्न आएका थिए । तर उनलाई ऋण नपत्याएको भन्दै उनी सोहि दिन ‘पख म देखाईदिन्छु’ भन्दै बैंकबाट निस्किएका थिए । त्यसको भोलिपल्ट उनी बा ५ प २६२५ नम्बरको कारमा खुकुरीसहित बैंक आएका थिए । प्रहरीले उनको कारबाट १६ इन्चको सिरुपाते खुकुरी, चक्कु, यौन उत्तेजना बढाउने भियग्रालगाएतका सामाग्री समेत बरामद गरेको छ ।